Tama ba ang aksyon ni Sen. Franklin Drilon nga himuong pribado ang 26 ka mga government owned hospital? (POLITICAL ISSUE APRIL 15, 2012)

Mga higala, atong himoung sentro sa diskusyon, ang bill sa Senado nga giduso ni Sen. Franklin Drilon bag-ohay pa lamang nga nagtumong nga hatagan ug fiscal autonomy ang 26 ka mga national government hospitals sa nasud aron himuong Government-Owned and Controlled Corporation (GOCC).

Sumala ni Sen Franklin Drilon nga tumong sa pagduso sa Senate Bill 3130 o mas naila isip National Government Hospital Corporate Restructuring Act, nga hatagan ug kagawasan ang 26 ka mga government hospitals sa nasud nga mangita ug pamaagi aron makalikom ug pondo nga magamit aron mapahapsay ang serbisyo sa publiko. Gidugang sa senador nga pinaagi niini, makadaginot sa gasto ang gobyerno ug matagana ang pondo sa ubang programa sa panglawas.

Ang mga government hospital nga gisugyot o himuong Government-Owned and Controlled Corporation (GOCC) ang gilangkuban sa Cagayan Valley Medical Center, Veterans Regional Hospital, Baguio General Hospital and Medical Center, Region I Medical Center, Ilocos Training and Regional Medical Center sa Northern Luzon; Dr. Paulino J. Garcia Memorial Research and Medical Center, Jose B. Lingad Memorial Medical Center sa Central Luzon; ug Batangas Regional Hospital sa Southern Luzon.

Nalakip ang Bicol Medical Center and Bicol Research Training and Teaching Hospital sa Bicol Region ug Quirino Memorial Medical Center, Jose R. Reyes Memorial Medical Center, Rizal Medical Center, Amang Rodriguez Medical Center, San Lazaro Hospital ug Vicente Sotto Memorial Medical Center, kini tanan nahimutang sa National Capital Region.
Sa Visayas Region, anaa listahan ang Corazon Locsin Montelibano Memorial Regional Hospital, Western Visayas Medical Center sa Region VI ug Eastern Visayas Regional Medical Center sa Region VIII.

Samtang sa Mindanao, nalakip usab ang Northern Mindanao Medical Center sa Cagayan de Oro, Mayor Hilarion A. Ramiro, Sr. Regional Training and Teaching Hospital sa Region 10; ang ato dinhi sa Mindanao sa Davao, mao ang Southern Philippines Medical Center ug Davao Regional Hospital sa dakbayan sa Tagum, kanang duha ka mga dagkong ospital nga kadangpan sa atong mga kaigsuonang kabos, himuon na kanang Government-Owned and Controlled Corporation (GOCC). Kabalo ba kamo nga ang tumoy anang corporasyon, mao ang paghakot ug ganansya gikan mismo sa katawhan.

Nalakip usab ang Zamboanga Medical Center sa region 9 ug Cotabato regional and medical center sa region 12 ug Caraga regional hospital sa region 13. Sa bill ni Drilon mga higala, gikanayon nga sa panahon nga mahimu na nga Government-Owned and Controlled Corporation (GOCC) ang 26 ka mga ospital sa gobyerno sa tibuok Pilipinas. Sa ilawom sa sugyot balaudnon, ang mga administrador sa mga ospital, gihatagan ug kagawasan “to manage its resources; acquire, lease or sell assets; borrow funds from local or foreign creditors; and accept donations o sa bisaya pa, hatagan ug kagawasan sa pagdumala sa ilang gihuptang hospital,mupalit ug monaligya ug mga assets, makapangutang ug dugang pondo gikan sa lokal o langyaw’ng tigpa-utang ug ang pagdawat ug donasyon gikan sa mga langyaw’ng kanasuran.

Ang ospital na mismo ang modetermina sa iyang organizational structure ug staffing pattern base sa mandato sa probisyon sa GOCC Governance Act of 2011. Sa ato pa mabutang sa kritikal o alangin ang kahimtang sa atong mga nurses ug doctor nga mataktak o mapalagyot sa ilang trabaho tungod kay kung ginansya ang hisgutan, kinahanglan nga kuhaan ang mga trabahante nga nahilakip sa operasyon sa usa ka ospital.

Daghan pa ang unod sa Senate Bill 3130 o mas naila isip National Government Hospital Corporate Restructuring Act ni Drilon. Kung basahon ang bill ni Drilon ug imu kining pagatun-an, para kuno aron matubag ang problema ug mahatagan pa ug mas maayo nga serbisyo ang mga kabos nga katawhan sa mga pampublikong balay-tambalanan o gov’t owned hospital ilawom sa nalatid sa Government-Owned and Controlled Corporation (GOCC).

Pero unsa man jud ang tumong ug tinguha sa Senate Bill 3130 o mas naila isip National Government Hospital Corporate Restructuring Act ni Drilon. Ang gibutyag ba ni Drilon sa iyang gipadayag nga katin-awan o explanatory note sa iyang bill nga mupalambo ug mupalig-on sa kapasidad sa serbisyong panglawas sa katawhang Pilipino?

Mga igsuon akong gisuta ang kamatouran kabahin sa tumong ug tuyo sa gobyerno ilawom sa PPP o Public Private Partnership, mga mandato ug kondisyon nga gihukad gikan sa world bank ug sa IMF o sa International Monetary Fund sa mga programa sa gobyerno sa iyang responsibilidad sosyal ngadto sa iyang katawhan. Ang klaro ug tataw nga plano nga ibutang sa control sa pribadong sistema ang mga nag-unang sosyal nga responsibilidad sa gobyerno ngadto sa iyang mga katawhan. Usa na niini ang responsibilidad sa panglawas dikta sa mga langyaw’ng institusyon o kaha organisasyon nga gibaligyaan sa atong imahe o kaha kalag sa atong mga Pilipino binuhatan sa sentrong liderato sa atong pang-gamhanan sa kasamtangan. Mga higala, kining dikta na sa mga langyaw’ng kapitalista.. dili lamang sa panglawas kundi lakip ang responsibilidad sa kagamhanan alang sa patas ug maayo nga programang edukasyon ngadto sa atong kabus nga kabataan nga buot magtungha sa elementarya, sekondarya ug kolehiyo nga nangandoy nga makatagam ug kaharuhay sa umaabot nga panahon. Dili lamang edukasyon lakip na usab ang paghatag ug atensyon sa problema sa elektrisidad sa nasud Pilipinas ilabi na dinhi sa Mindanao, ilawom sa Public Private Partnership.. kining tanan, dili na kagamhanan ang magbuot kundi dikta sa ganansya ug interes sa langyaw’ng kapitalista nga nagkabayo sa serbisyong sama niini ilawom sa Electric Power Industry Reform Act (EPIRA) EPIRA bill kaniadto. Ang mga negosyanteng nagnegosyo ug petrolyo, mao gihapon tungod sa oil deregulation law nga dapig ug gihungit sa langyaw’ng interes ug pugos nga ipatulon sa mga Pilipino nga kasamtangan, sila nahimung buaya nga naglamoy ug nagpahimulos kung unsa man ang naa sa mga Pilipino o kaha unsa may anaa sa nasud Pilipinas. Ang atong mga minahan ug uban pa, kabahin ug tumong sa langyaw’ng mga interes aron hutdon sa paghigop ug kuhaan ug kusog ang mga Pilipino aron samut nga dili na makabarug ang katawhan nga nalubog sa kakabos.

Sa baynte uno anyos naku nga pangpakabuhi ning maanindot tang kalibutan. Alang kanako, dili ko maghisgut kung unsa nga matang sa pagkatawo si Senador Franklin Drilon sa liderato ni Pangulong Benigno Noynoy Aquino III ilawom sa dikta sa langyaw’ng interes.

Mga igsuon, kamo na ang magbasa ug magtimbang-timbang kung si kinsa si Senador Franklin Drilon kung unsa siya nga matang sa tawo nga nahimung dakong tawo ilawom sa Inahan ni Noynoy nga si Gloria Macapagal Arroyo.

Kini nga aksyon ilawom sa Senate Bill 3130 o mas naila isip National Government Hospital Corporate Restructuring Act, paghimung mga GOCC sa mga hospital sa gobyerno ngadto sa pagporma sa Blueprint sa interes sa World Bank ug sa IMF o International Monetary Fund nga siguradong mupadulong sa ilang interes ang paghapot kung unsa man ang anaa sa mga Pilipino nga aron ilang negosyo, ila na niining nasura.

Mga igsuon kung unsa man ang anaa sa Blueprint, angay unta mupugong niini ang atong mga naglingkod sa Malacanang. Imbes nga magpagamit niini nga interes tungod kay tataw nga dili kini maghatag ug kaayuhan sa kadaghanang katawhan ning atong nasud Pilipinas, hinuon mas muhimo pa kini ug bangi sa nagkadaiyang hut-ong sa katawhan sa atong nasud. Pananglitan ang Southern Philippines Medical Center diha sa Bajada, Davao Regional Hospital sa Tagum. Kana nga mga ospital, mahimung dili na ospital sa mga pobre o kaha kabos tang katawhan tungod ka yang Government-Owned and Controlled Corporation (GOCC), ganansya ug interes na sa Korporasyon ang tataw nga sundon niini ug dili na ang pagtabang sa mga katawhang kabos sa nasud Pilipinas. Plantado na lamang ang ngalan o kaha gamiton na lamang ang ngalang kabos apan kamatuoran niini dili mga kabos ang serbisyuhan niini nga mga ospital..Wala na’y mga lumad o kaha kabos nga ma-atiman tungod kay ang makasulod na lamang niini ang laing hut-ong sa mga middle class o kaha mga kwartahan nga adunay kapasidad nga makabayad sa ipahamtang unya nga balayrunon.

Ang sakit nga kamatuoran nga kung ikaw walay salapi, sama sa polisiya sa mga pribadong ospital nga kung wala kay downpayment, dili ka atimanon ug pasagdahan ka na lamang nga ikaw hangtud nga mamatay. Sakit palandungon nga mamahimung wala na kini kalainan sa mga pribadong ospital, kining ospital sa gobyerno nga maoy gisaligan sa atong mga katawhang kabos ug uyamot.

Sakit sa dughan apan dili lamang diha mag-antos ang katawhan kabahin sa niining lakang sa katawhan. Pasaylua sa pag-ingon nga kini nga gobyerno wala magtan-aw sa kahimtang sa kadaghanan…Dili maka-antigong ma-ikog sa kusog sa katawhan nga maoy mibutang kanila sa gahum, inay mas gidapigan pa nila ang dikta sa ilang mga amo o kaha mga bossing nga naghatag ug giya kanila sa kada adlaw nga paghatag ug desisyon sa panggamhanan sa atong nasud.
Tuwid na daan, padulong sa bulsa ug interes sa langyaw’ng kapitalista..Tuwid na daan padulong sa kaala-utan sa mga daghang Pilipino ug ang Tuwid na daan, pa-ingon sa kusog nga aksyon ugma damlag, katawhang nagpakabana makigbisog alang sa kaayuhan sa atong nasud Pilipinas……